智力鬥爭

啱啱係友人個blog到睇到一編關於最愛嘅文字, 其實我都好認同, 人往往都係貪心同自私, 永遠拖一個愛一個, 所以好多時拖住嘅都唔係自己嘅最愛!! 好似小妹有一班朋友群, 係佢哋當中, 幾乎全部都係一拖二, 正印嗰個唔係最鍾意, 反而偷偷摸摸嘅先係最愛, 就算唔係一拖二嗰啲, 都係一樣, 佢哋都有女朋友, 但係最鍾意嘅都係以前女朋友 !! 或者又有人係騎牛搵馬嘅心態, 拖住個, 但又想搵個好啲, 但點知搵到咁上吓, 發覺自己原來已經有乜本錢, 咁咪唯有死死地氣繼續落去 !! 但係咁點解要開始呢, 會唔會對對方好唔公平呢 ?? 話說回頭, 簡單講句, 咪就係因為人係自私, 自己怕寂寞,怕悶, 就唔去理人哋嘅感受 !! 其實人點解唔可以簡單啲呢, 係鍾意就鍾意, 點解成日都要你猜我度, 你呃我時, 我又呃返你, 好似一場智力鬥爭咁, 咩 "唔係唔鍾意,只係唔夠鍾意" 呢啲咁嘅藉口已經好厭啦, 要咁樣去對住一個人,真係會好攰, 拍拖係要開開心心架嘛, 既然唔夠鍾意嘅, 咪唔好一齊囉, 咁樣相方都唔駛煩, 又唔會有咁多不愉快嘅事發生, 所以小朋友真係永遠都係最開心, 因為佢哋係最簡單嘛~~!!