記性

香港人一向善忘,差啲全世界都知架啦,而小妹都絕對認同,善忘嘅速度快到相信冇人能及,近期我哋又再一次引證俾其他人睇,香港人嘅呢個"特質"係有幾強 ~~~個幾禮拜之前,各大報章好大肆咁報導議員遇襲嘅新聞,但一個禮拜之後,女藝人俾偷拍嘅新聞已經令大家將議員嘅傷勢,無奈,緝兇嘅事忘記得一乾二淨, 拋諸腦後,可想而知香港人嘅善忘能力係幾咁犀利!! 雖然警察叔叔仍然係都做緊嘢(我諗),但香港市民已經冇興趣再知~~~而另一邊廂,女藝人就不斷係到哭哭啼啼,又報哂警,申請哂禁制令咁,我知道我唔係受害者,我未必明白佢嘅心情,報警等行動係正常,亦都係啱,但唔駛咁誇張,好似電影做宣傳,要開哂記招,話哂俾全人類知咁先知得,咁做會唔會略嫌矯揉造作呢?唔知大家仲記唔記得當年劉嘉玲都做過受害者,佢嗰件事咪仲大,但係佢反而係好後期先出嚟講咗幾句嘢(可能大家會話件事嘅性質唔同啦),而家如果冇人講起大家咪又唔記得咗發生過~~需唔需要搞到好似要全香港人去幫佢攞返啲相,仲話要底片(真係唔知去邊到搵俾你),而家係數碼年代,就算delete咗,佢有心嘅都可以復原!!

傳媒係有唔啱,但係生意人邊會做蝕本生意架,大家唔好奇,唔八掛,聽到某人講"喂喂,今期乜週刊有某藝人裸照",跟住你一本,我一本咁,咪就養活咗佢哋囉 ~~咁大家係鬧人哋之餘,有冇檢討吓自己呢??人就咁架啦~~永遠都淨係識得話人唔識話自己,真係最老套嘅嘢,永遠都係最啱架!!

今日係到聽收音機報新聞時, 聽到報導話壹傳媒收到二千幾宗投訴,破咗歷年嚟最高紀錄,我聽落去好似係一件值得高興嘅事,要全民慶祝,破健力士世界紀錄咁~~唉~~~一路鬧就一路幫佢做宣傳,將啲noise再放大~~多謝各位嘅合力免費宣傳!! (我而家都做緊,成為其中一份子添) 好悶,好悶,呢幾排打開報紙都係呢幾單新聞,真係好悶呀~~~救命~~~STOP IT ~~~PLS~~~!!

你嘅IQ

唔知大家有冇興趣check吓自己嘅IQ有幾高呢?? 有嘅話,可以試吓以吓呢個TEST,但講明先,呢個TEST都幾長,都要花啲時間,所以係得閒先好玩呀~~~

ready ?? let's go ~~~~

http://www.iqtest.dk/testEnglish.swf

以策安全

前幾日,小妹收到人生嘅第一張信用咭,好多人都可能覺得好奇怪,而家呢個年代點可以冇信用咭架,但偏偏我就係呢類人,可能小妹對自己嘅自制能力多少都有啲懷疑啦~~同埋個袋有幾錢咪用幾多囉,冇咪唔用囉,冇咩咁大不了,點解要先洗未來錢呢??~~~所以唔去擁有一張係最安全嘅!!~~而且亦都因為眼見身邊有唔少朋友都為咗找咭數而煩惱,覺得佢哋真係幾辛苦架!!仲有嗰啲大學生呀,打工仔呀,一張咭嘅咭數要搵另一咭去找,之後越積越多,最後搞到要申請破產嘅個案亦都聽唔少,都真係幾恐怖,你都咪話唔驚~~~但大家又可能會問點解而家又走去申請呢,原因係小妹恐防日後人在海外嘅時候,現金又用哂,咁就真係一無所有啦~~所以都係用嚟防身,以策安全嘅啫~~~所以我諗我都會好少機會要用到佢,但銀行可能就會係好唔歡迎我呢啲咁嘅客戶啦~~~哈哈~~~
可能正因為咁,所以當收到張信用咭時,心情又冇乜特別,唔會特別興奮,梗加冇諗過用呢張咭第一樣係要買啲乜!係咪有啲唔正常呢??咁係咪可以同自己講句"你特別啫!!"~~~~

大件事

呢2日打開報紙,就見到阿嬌因俾人偷拍而聲淚俱下嘅新聞,今日仲要係東方日報嘅A1頭條,搞到A1變咗C1咁,但係如果阿嬌唔係 藝人,係一個普通女仔嘅話,咁呢件事又會唔會搞到咁大呢?我相信唔會,不過可能我哋係港聞版依然會見到呢單新聞,但編幅就可能冇咁大啦!!咁究竟呢單新聞應該擺係邊呢?港聞版?娛樂版?而家香港啲娛樂新聞真係唔知想點,好似藝人(已經去到唔分男女嘅地步)啲衫越少布,越多醜態就越好睇咁,其實啲人係想知藝人嘅最新動態,定係想睇吓啲藝人有幾衰呢??而港聞版亦都唔好得幾多,俾渲染得好嚴重,有時真唔知自己原來睇緊港聞版,寫一啲好普通嘅新聞,都要誇大幾倍,唔通真係會好賣啲??

唉~~而係另一邊廂,壹本便利嘅老闆,黎先生,就不段俾人破口大罵,但佢都保持佢一貫作風,你有你鬧,佢有佢做新聞,還記得蘋果日報啱啱出版嘅時候,黎先生就拍咗一個廣告,能夠令我仲記得呢個廣告嘅原因,就係喺廣告入面有一幕黎先生嘅背脊插滿箭,我諗佢真能夠如佢所願啦~~黎生,好嘢!!你做到啦~~!!

小森下廚

今晚去咗一個朋友屋企玩煮飯仔,小妹都好耐冇下廚啦,煮咗3味家常小菜--1)蕃茄肉碎炒蛋,2)香煎蒜茸雞翼,3)蒜茸炒椰菜...幸好,水準依然,2位朋友仔都食都津津有味,平時唔添飯嘅,今晚都走去食多碗,真係一大安慰,對於自己嘅廚藝信心有進一大步啦~~確實小妹都幾鍾意下廚,除咗鍾意個過程之外,其實小妹係最鍾意見到食到我煮嘅嘢嘅毎一個人,都食到津津有味,一件不漏,而又開開心心,呢個先係最大嘅成功感!!
係呢個時候,就另我諗起係上2個星期,無線電視嘅綜藝節目--美女廚房,吳雨霏(Kary)可以係電視城放火呢一幕,真係無得頂!火勢越來越大,但佢就淨係企咗係到望住問點解會咁(但記住成件事係佢搞出嚟架喎!),點解佢唔嘗試吓去熄咗個爐,再搵啲水去救熄個火呢??真係奇怪~~都係煮嘢食啫,唔係玩雜技呢~~~所以各位朋友家居意外真係唔可以忽視呀~~~小森!!小森!!

第一次

WeLcOmE~wElCoMe~!!呢個係我個blog嘅第一個post,點解會有呢個blog呢,其實我都唔知點解,只係知今日返到屋企突然之間就好想去開一個,之前有人叫過我開,但本身自己已經有寫日記嘅習慣,就覺得無需要再開個blog去做啲類似嘅事,更加唔想人云亦云,所以等都而家先就去開個blog!!呢個blog就咁誕生咗~~~開呢個blog嘅動機,同我覺得寫blog嘅態度都幾吻合~~~就係隨心~~~想做就去做!!