一個失落的星期日

唉~~~今日小妹真係好失落, 因為小妹係噚晚玩樂完之後, 撘的士返屋企, 落咗車行咗幾步之後, 就發覺自己唔見咗銀包, 小妹已經即時返轉頭, 係行經嘅地方仔細咁搜索一次, 但都苦無結果, 所以我相信應該係漏咗係的士上面~~~相信試過唔見銀包嘅朋友都知道唔見銀包係一件幾咁煩嘅事, 所有證件, 提款咭, 信用咭都要補領, 另外, 可能仲有一啲有紀念價值嘅嘢係裡面, 所以唔見銀包真係好煩~~~小妹一諗起呢一大堆問題真係頭都大埋, 同埋我整個人都好冇安全感, 好空虛, 而令到我好失落呀~~~真係有冇好心人可以執返個銀包俾我呀~~~救命呀~~~~

郊遊

今個星期六, 小妹終於都做返啲比較健康嘅活動, 就係踩單車, 真係好耐都冇做呢類型嘅活動啦, 都成2年啦~~所以噚日開始踩咗一段路程之後, 小妹嘅身體就已經發出警號, 話俾小妹知, 真係太耐冇做過運動, 但係喺咁好嘅天氣之下, 當然唔可以就咁錯過一個機會架嘛, 再者, 眾人嘅心情都好好, 又充滿郊遊嘅氣氛, 只係大風咗啲!! 而我哋嘅行程係"例牌" 由沙田出發, 踩到去大尾篤, 再入埋去船灣淡水湖嘅大水霸。唔知係咪大家都係好耐冇做運動呢, 所以起初進度比較慢, 同埋停低嘅次數亦都幾多, 最終我哋幾經辛苦, 用咗3個幾鐘先去到大水霸, 係呢個時候大家已經變得冇乜表情, 有啲呆滯, 因為今日要咁早(10:00am)出到嚟, 放假, 又咁凍,以小妹呢啲"夜鬼"嚟講, 要咁早起身真係一件好痛苦嘅事, 之後仲要做咁激嘅活動, 真係想唔呆滯都幾難~~雖然係好辛苦, 但都幾好玩, 只係喺回程嘅時候出咗少少意外, 就係小妺嘅友人好不幸地"迷路", 冇錯, 大家真係冇睇錯, 踩單車踩過呢個路程嘅人都知道, 呢條只係一條單程路, 只係有時1, 2個嘅分岔隧道路口, 唉~~!! 但小妹嘅友人都迷路了~~~話說我哋一行6人,分成3隊人咁踩, 當然有快有慢, 而小妹同另一位友人係最頭嘅一隊, 但去到大埔海濱公園等咗10分鐘先見到第二隊嘅朋友, 之後我哋再等咗一段時間都唔見最後一隊, 就心知不妙, 因為佢哋嘅組合有啲危險, 一個係路痴, 一個就"傻更更", 而我哋又估唔到佢哋會落後咁多, 同我哋嘅距離差咁遠, 所以就不以為然, 而最後意外就咁發生咗, 搞到呢2位友人要撘的士, 真係估唔到~~~哈 !! 踩完單車, 大家拖住疲倦嘅身體食個飯之後, 都仲要出去玩, 不失我哋嘅爛玩本色, 玩到成3點幾先返屋企, 小妺都要同自己講個服字囉 ~~

過去了

06年終於過去啦, 的確, 小妹真係好想06年快啲過去, 因為係呢一年裡面, 有好多唔開心, 唔順利嘅事係小妹嘅周圍發生, 由其是臨近年尾嘅呢幾個月, 倒楣嘅程度更甚, 而亦都遇到好多好影響小妹嘅事, 所以希望係新嘅一年有一個新嘅開始, 遇到嘅所有人與事都要開開心心, 做人最緊要都係呢樣嘢, 樣樣都順順利利, 所有衰嘢都快啲走哂~~我都希望所有識我嘅人都一樣, 事事順利, 開開心心 !! 大家一齊努力, 加油 !!