賽跑

啱啱聽完廣播劇 (903-森之愛情-滿天星), 覺得劇中講嘅一啲理論都幾啱, 就係愛情就好似一場賽跑咁, 係好老套, 但又真係好啱! 你要同你嘅伴侶一齊跑, 一齊行同一條路, 一齊行過所有障礙, 呢件已經係一件好難嘅事, 2個人要同一步伐, 去維繫一段關係, 一啲都唔容易 !!! 除咗咁之外, 其實你仲要同其他競爭者鬥快, 鬥快去到你鍾意嘅人嘅心入面, 大家附出嘅都係真, 分別就只係睇吓邊個跑得快啲, 有時遲咗就係遲咗~~有時所謂嘅第三者, 就係俾人哋跑得慢, 行慢咗, 但就係咁, 第三者就係愛情裡面注定係一個失敗嘅角色, 大家嘅愛都係真, 第三者只係遲咗, 大家都冇錯, 只係跑得快就係贏, 跑得慢嘅就係輸! 人係自私, 相信世界上冇一個人係想做第三者, 電視劇都話我哋知做第三者嘅滋味一啲都唔好, 更加唔會有好嘅下場!! 我諗毎個人都想自己就係原配, 光明正大, 開開心心, 幸幸福福咁同自己鍾意嘅人一齊生活!! 但有時, 當你以為自己係原配嘅時候, 好可能自己先係第三者, 世事嘅嘢真係好難預料!! 都係嗰句啦, 珍惜自己身邊嘅毎一樣嘢, 同埋及時行樂, 唔好錯過上天俾你嘅毎一個機會~~~而小妹自己都好努力咁係條跑道到跑緊, 但就冇乜方向, 得個跑字, 所以希望大家已經跑贏咗你嘅對手, 同自己鍾意嘅人一齊繼續你哋嘅愛情長跑, 過一個開心嘅聖誕節!!

應承

呢排小妹愛上咗Eric Kowk 嘅"應承", 有幾會快啲聽吓, 我就只可以提供歌詞俾大家 ~~


Eric Kwok - 應承

曲：Eric Kwok
詞：林夕

答應　你我的往事越往後　越美麗
亦答應　來自內心的話跟你　能見底
承諾你　志願給你自由發揮
絕對不會用謊話　好像不敢呃上帝
終此生使你快樂憑智慧　你肯一笑扮傻都抵
得到的已是一切　不需的都可放低

* 當天下樹林倒地　身處最壞境地
但我都不會離開你　只會著緊你
不顧自己去就你

當感受白頭滋味　走過漫長天地
但我都依然拖你　給你來冚被
恩愛才越來越美*

答應　對你寬厚維持風度　沒燥暴
亦答應　無論大小事情講過　能做到
承諾你　與你好友亦能友好
未怕黑髮亦不保　不懼天荒享受地老
懂得寬恕叫以後無控訴　永不爭拗自然相好
不擔心雨大風高　歸家永遠沒迷路

Repeat *

有感而發

好耐都冇係到同各界好友見面啦~~~

前兩日, 有一位好耐冇見嘅朋友生日,當然有指定動作, 生日派對 - 卡拉OK, 都係一啲4,5班互不相識嘅男男女女聚首一堂嘅派對, 因為一個人而走埋一齊,係同一個地方相遇, 做嘅好可能只係一晚嘅"朋友",呢類型嘅派對已經一啲都唔新鮮, 而大家亦都唔會介意識唔識對方, 只會在意嗰一晚好唔好玩, 同埋主角同你有幾熟, 呢啲就係現代人嘅生活 ?? 可能吧 !! 因為大家都太無聊, 人與人之間嘅溝通就係靠呢啲場合之中維繫, 朋友間要出嚟食餐飯好似好難咁, 大家都好似好難去抽一啲時間出嚟, 就算出到嚟又好似驚唔知有咩講咁, 點解會咁呢, 係咪真係科技太發達, 令大家忘記咗點樣同人溝通, 大家只係識得對住電腦, 互聯網傾, 但係一對住人就唔知講咩 !! 其實講到底, 都係一個"懶"字作怪, 大家都只係無事忙, 同埋覺得大家咁熟, 咁好朋友,唔駛成日搵嘅, 好多好多藉口, 但朋友如果真係唔keep住搵, 就真係會冇(又係一個好老套嘅金句住-珍惜眼前人)~~因為我都有呢啲經驗, 但問題係唔知點解小妹啲朋友係唔會搵小妹, 多數都係小妹主動, 佢哋好少會話得閒出嚟食飯, 所以逐漸小妹都心灰意冷, 而家都做少咗做呢啲吃力不討好嘅事, 因為做得多真係好攰架~~~另外, 小妹啲朋友真係好好人, 通常都係有事發生, 要人傾訴, 搵人幫手嘅時候就會諗起小妹, 都唔知好事定壞事, 但當小妹想搵佢哋幫吓手嘅時候, 啲人就永遠唔知去咗邊, 真係好無奈, 相信小妹係朋友心目中嘅住置就係呢到~~sorry ! sorry ! 有感而發, 遠咗 ~~

其實今日想講嘅係, 嗰位好耐冇見嘅友人, 對小妹講咗一啲小妹自己都唔發覺, 又冇諗過嘅說話, 佢話今次見到小妹覺得小妹比以前開心咗, 佢之前見到小妹係唔開心, 不過而家就唔同咗, 但小妹毎次見到佢嘅場合都係啲一大班人玩樂, 嘻嘻哈哈嘅時候, 佢對我都有啲感覺, 真係令小妹好意外, 可能當時小妹心裡面真係有唔開心嘅事, 但已經記唔起係咩事~~~小妹意外, 係估唔到一個唔常見嘅朋友竟然遠勝小妹嘅一啲好朋友, 會發現小妹內心嘅真正感受!!其實小妹係比較特別 (只係本人覺得), 如果小妹唔想俾人發現小妹係唔開心嘅, 真係可以同平時冇分別(呢個都係天蠍女嘅特質), 但其實自己個腦不斷係到浮現啲唔開心嘅畫面 !! 而且我唔想影響到我周圍嘅人, 因為唔開心係我自己嘅事, 成班人一齊玩, 我唔想因為自己嘅情緒而影響到其他人玩樂嘅心情, 所以我都盡量投入整個過程, 希望大家都開心 !! 不過我都好多朋友都話我有時為人諗得太多, 自己好辛苦, 叫我自私啲, 做人真係好難呀~~我都係想毎個人都開心, 但有時真係"順得哥情失嫂意"~~所以最好都係唔好咁好人啦~~嗚呼哀哉 !!